Á fordæmalausum tímum í starfi kórs, þegar við getum ekki sungið saman, þá syngjum við sundur. Og saman. Sundur og saman! Í vonbrigðum liðins vetrar ákvað kórinn að syngja lag sem við hefðum haft áður á efnisskránni og fólk gæti sungið heima fyrir framan myndavél. Fyrir valinu varð lag Ed Sheeran „I See Fire“ úr kvikmynd um Hobbitann, útsett af kórstjóranum okkar Gunnari Ben.

Svo merkilega vildi til að í miðju upptökuferlinu kom einmitt eldur úr iðrum jarðar, líkt og lýst er í laginu, og því fannst okkur tilvalið að blanda myndefni frá Geldingadölum saman við upptökurnar okkar.
Afrakstur heimavinnunnar má sjá í þessu myndbandi, og við vonum að þið njótið útkomunnar!

Síðasta árið er búið að vera rússíbani hjá okkur, eins og flestum öðrum á þessum tímum. Vonir, væntingar og.... vonbrigði! En öll él styttir upp um síðir og við trúum því staðfastlega að þetta verði tónleikavor hjá okkur!

Eins og flestir kórar heimsins höfum við ekki getað sungið saman í marga mánuði, og söknum þess gríðarlega. Við ættum að vera að syngja á tónleikum núna, þannig að við ákváðum að sameinast allavega í sýndarkór. Syngja saman, þó við séum öll heima hjá okkur.
Þetta var tekið upp í Desember 2020, en hver meðlimur tók sönginn upp á farsímann sinn eða vefmyndavél og síðan var þetta klippt saman. Þetta var frábær lærdómur fyrir okkur öll, og við vonum að þið njótið útkomunnar!
Lagið er gamalt þjóðlag, og útsetningin eftir Hjálmar H. Ragnarsson

Á vormánuðum 2018 fór kórinn í kórbúðir í Skálholti, til að æfa fyrir tónleika í Salnum Kópavogi. Vorum við svo heppin að fá að æfa aðeins í Skálholtskirkju, en hljómburðurinn þar er töfrum líkastur. Hér er eitt lagið sem við æfðum þann frábæra dag 🙂

Þegar svartasta skammdegið er yfirstaðið og sólin farin að hækka á lofti aftur ætlar Vocal Project að vera með tónleika í Gamla bíó. Þar verða sungin lög úr ýmsum áttum sem minna okkur á að eftir vetur kemur vor. Næsta vor er sérstaklega spennandi fyrir kórinn þar sem sólin verður ekki bara komin enn hærra á loft heldur erum við líka að fara í keppnisferð til Póllands. Tónleikarnir núna í janúar eru því stór liður í undirbúningsferli fyrir ferðina. Á þessum tónleikum verða flutt lög úr ýmsum áttum og meira að segja slæðist inn í prógrammið eitt lag sem kemur með okkur í keppnina. Við hlökkum til að sjá ykkur sem flest.

Við í Vocal Project höfum skráð okkur til leiks á virtu alþjóðlegu kóramóti í Krakow í Póllandi á næsta ári. Svona ferð kostar talsvert og því treystum við á fjáraflanir.
Ein af okkar megin fjáröflunum eru tvö happdrætti, og í dag hefst miðsala á Jólahappdrættið okkar. Verð miða er aðeins 1.500 krónur, og má nálgast miðana hjá kórmeðlimum.

Við þökkum kærlega fyrir allan stuðninginn, og vonum að vinningarnir gleðji svona rétt fyrir jólin :)

Um viðburðinn

Tveir frábærir samtímakórar leiða saman hesta sína á tónleikum sem enginn tónlistarunnandi ætti að láta framhjá sér fara!
Danski kórinn Vocal Line og íslenski kórinn Vocal Project eru um margt ólíkir en eiga þó sameiginlegt að hafa vakið athygli fyrir fágaðan söng í flóknum og fjölbreyttum útsetningum. Kórarnir einblína báðir á samtímatónlist, svo sem popp, rokk, jazz og dægurlagatónlist.
  --
Vocal Line er a cappella kór sem samanstendur af 30 söngvurum sem með einlægri innlifun, listrænu skynbragði og einkennandi hljóm ná á hverjum tónleikunum á fætur öðrum að snerta huga og hjörtu áheyrendanna. Vocal Line hefur frá upphafi haft það að markmiði að vera í fararbroddi á lands- og alþjóðavísu varðandi þróun á rytmískum kórsöng.

Í gegnum árin hefur Vocal Line öðlast mikla viðurkenningu fyrir starf sitt, bæði í Evrópu og víðar um heim og unnið til fjölda alþjóðlegra verðlauna. Vocal Line urðu valin "Eurovision kór ársins 2019", keppni sem haldin var í Svíþjóð milli 10 evrópskra kóra. Kórinn fékk þar að auki nafnbótina “European Voices Award” fyrr á árinu. Vocal Line hefur haft heiðurinn af að syngja með heimsþekktum tónlistarmönnum á borð við Bobby McFerrin í New York og Rolling Stones á Hróarskeldu hátíðinni.
Um langt skeið hefur Vocal Line haft ákveðna tengingu við Ísland, og m.a. sungið lög eftir Björk, Ásgeir Trausta og hjónin Helga Jónsson og Tinu Dickow, sem nú eru búsett á Íslandi. Tónlistarmyndband við titillag síðustu plötu Vocal Line, True North, er unnið af íslenska ljósmyndaranum Gísla Dúa og þá er Þingeyingurinn Gunnar Sigfússon fyrsti og eini Íslendingurinn sem syngur með Vocal Line. Vegna þessarra tengsla heldur kórinn nú loksins í langþráða tónleikaferð til Íslands til að leyfa Íslendingum að njóta tónlistarinnar.

Þann 23. maí næstkomandi verðum við með tónleika í Guðríðarkirkju. Lögin sem við tökum eru í fjölbreyttum, skemmtilegum og krefjandi útsetningum. Mörg laganna sem flutt verða hafa slegið í gegn og flest þeirra trónað á toppi vinsælustu popplaga síðustu ára. Það er því óhætt að segja að þetta verði sannkölluð poppveisla. Tónleikarnir verða að hluta til með undirleik og léttu slagverki. Þið verðið ekki svikin af þessu fjölbreytta prógrammi sem við höfum sett saman að þessu sinni. Hlökkum til að sjá sem flesta!

https://tix.is/is/event/7982/vortonleikar-vocal-project/