Í dag hefjum við sölu á miðum í Jólahappdrætti Vocal Project. Við erum að fara í keppnisferð til Krakow í Póllandi í Júní 2024, sem átti að verða 2020 en ekkert varð úr - útaf soltlu, eins og sagt er. 🙂
Svona ferð kostar talsvert og því treystum við á fjáraflanir, en sú fyrsta formlega er Jólahappdrættið. Verð miða er aðeins 2.000 krónur, og má nálgast miðana hjá kórmeðlimum eða í gegnum netfangið VocalProjectFjaroflun@gmail.com Vinningar eru ekki af verri endanum og vinningaskrá má sjá undir flipanum HAPPDRÆTTI hér efst til hægri.
0 Comments
Vocal Project - Poppkór Íslands málar bæinn hvítan og fagnar því að það er komin vetrartíð. Fjölbreytt dagskrá úr ýmsum áttum, sum ísköld, önnur dúnmjúk. En rauði þráðurinn út í gegn: það snjóar. Leyfið einum skemmtilegasta kór landsins að syngja ljúfa vetrarstemningu í hjarta ykkar!
Miðasala er hafin á Tix: https://tix.is/is/event/16610/-a-snjoar/ Langar þig ekki að koma og syngja í skemmtilegum kór? Vocal Project verður með raddprufur laugardaginn 26. ágúst. Sendu okkur póst ef þú vilt koma í prufu. Hlökkum til að heyra í þér! 😊
GOÐSAGNIR II: Á YSTU NÖF
Norðurljós í Hörpu 25. maí kl 20:00 Vocal Project endurtekur leikinn frá 2018 þegar kórinn flutti tónlist eftir goðsagnir poppkúltúrsins. Og nú er komið að framhaldinu. Dolly Parton, Whitney Houston, Guns N’ Roses, Led Zeppelin, Elton John og fleiri góðkunningjar pabbarokkara og diskódíva rötuðu á efnisskránna í ár og verða lög þeirra flutt við alvöru hávaðaundirleik húsbandsins, sem að þessu sinni er skipað Guðmundi Stefáni Þorvaldssyni á gítar, Sam Pegg á bassa, Kjartani Valdemarssyni á hljómborð og Jóni Geir Jóhannssyni á trommur. Sem fyrr er Gunnar Ben stjórnandi kórsins, en hann er Mývetningur, óbóeigandi og spilar stundum þjóðlagametal. Forsala er hafin á https://tix.is/is/event/15374/go-sagnir-ii-a-ystu-nof/. Tryggið ykkur miða í tíma, á lægra verði, því almennt komast töluvert færri að en vilja. Vocal Project ætlar að halda jólastyrktartónleika í Guðríðarkirkju þann 15. desember næstkomandi og koma áhorfendum í hið eina sanna jólaskap. Tónleikarnir verða jólagjöf kórsins til áhorfenda með sérstakri þökk til ykkar sem hafið stutt okkur og mætt á tónleika í gegnum árin og því verður frítt inn á meðan húsrúm leyfir.
Ef áhorfendur vilja svo styrkja gott málefni mun kórinn taka við frjálsum framlögum á tónleikunum, sem renna óskipt til Píeta samtakanna. Við hlökkum til að sjá ykkur sem flest í hátíðarskapi í Guðríðarkirkju, 15. desember kl 20:00. Um Píeta Samtökin: Í svartasta myrkri vetrarins er margt sem herjar á innri frið. Píeta samtökin sinna forvarnarstarfi gegn sjálfsvígum og sjálfskaða auk þess að veita aðstandendum stuðning. Starfsemin er rekin að fyrirmynd Pieta House á Írlandi og býður upp á viðtöl og stuðningshópa fyrir 18 ára og eldri. Hjálparsími samtakanna er opinn allan sólarhringinn. Það er alltaf von. Vocal Project blæs burt haustlægðinni með hressilegum tónleikum í Guðríðarkirkju. Efnisskráin er að þessu sinni innblásin af dívum og því öll lögin samin og/eða flutt af glæsilegu kvenfólki. Frá Adele til O'Riordan flytjum við ykkur ráðlagðan dagskammt af grl pwr!
Miðasala á Tix: https://tix.is/is/event/14243/vocal-project-a-hausti/ Þann 20. maí næstkomandi verðum við loksins með tónleika í Guðríðarkirkju, til að loka þessum langa vetri og bjóða sumarið velkomið með fjölbreyttum, skemmtilegum og krefjandi útsetningum.
Það er óhætt að segja að þetta verði sannkölluð tónlistarveisla, en lög kvöldsins koma úr öllum áttum; frá Rammstein til Spice Girls, og allskonar þar á milli. Lögin eiga það þó sameiginlegt að gleðja kórinn, og við vonum að þau muni gleðja áhorfendur jafn mikið. Hlökkum til að sjá ykkur! Miðasala á TIX: https://tix.is/is/event/13263/vortonleikar-vocal-project/ Það er söngþyrstur hópur sem bíður þess að halda fyrstu tónleikana í tæp tvö ár, og verða þeir í Guðríðarkirkju þann 21. október kl. 20:00.
Það er óhætt að segja að æfingarnar okkar gefi fyrirheit um magnaða tónleika. Kórinn hefur stækkað töluvert og sjaldan verið fleiri meðlimir, og hljómurinn eftir því. Efnisskráin er fjölbreytt, ballöður, popp og rokk, flest með undirleik. Þið verðið ekki svikin af þessu prógrammi. Við hlökkum til að sjá ykkur á tónleikunum... saman á ný. Miðasala á Tix: https://tix.is/is/event/12196/vocal-project-saman-a-ny-/ ATH: Þökk sé breyttum reglum þurfa gestir EKKI að framvísa neikvæðri niðurstöðu úr hraðprófi áður en gengið er inn í salinn, né vera með grímu á meðan gengið er inn og út. Engu að síður minnum við alla á að huga að eigin persónubundnu sóttvörnum. Hlökkum til að sjá ykkur! Á fordæmalausum tímum í starfi kórs, þegar við getum ekki sungið saman, þá syngjum við sundur. Og saman. Sundur og saman! Í vonbrigðum liðins vetrar ákvað kórinn að syngja lag sem við hefðum haft áður á efnisskránni og fólk gæti sungið heima fyrir framan myndavél. Fyrir valinu varð lag Ed Sheeran „I See Fire“ úr kvikmynd um Hobbitann, útsett af kórstjóranum okkar Gunnari Ben. Svo merkilega vildi til að í miðju upptökuferlinu kom einmitt eldur úr iðrum jarðar, líkt og lýst er í laginu, og því fannst okkur tilvalið að blanda myndefni frá Geldingadölum saman við upptökurnar okkar. Afrakstur heimavinnunnar má sjá í þessu myndbandi, og við vonum að þið njótið útkomunnar! Síðasta árið er búið að vera rússíbani hjá okkur, eins og flestum öðrum á þessum tímum. Vonir, væntingar og.... vonbrigði! En öll él styttir upp um síðir og við trúum því staðfastlega að þetta verði tónleikavor hjá okkur!
|